Әкиятләр буйлап гид

«Алтын алмалар турында әкиятләр» проекты аркасында Әлмәт мәшһүр рәссамнарның иҗат әсәрләренә тар диварлар тышында кагылу мөмкин булган сәнгать пространствосына әверелде. Ә #әкиятләрбуйлапгид курсы – ул урам сәнгате белән дуслык һәм мәхәббәткә әверелә алучы танышу. Мин ике маршрут буенча велосипедта экскурсияләр үткәрәм. Беренчесе «Мәдәният коды» дип атала, аның дәвамында дөньяның төрле почмакларыннан килгән рәссамнарның мураллары белән таныштырам. Икенчесе – «Шәһәр бизәкләре» – Әлмәт кешеләренең «Фрукты» төркеме урам сәнгате лабораториясе кысаларында ясаган эшләренә багышлана.

«Мин урбанистика, сәнгать һәм халык авыз иҗаты белән кызыксынам, шуңа күрә бу проектта катнашу форсатын кулдан ычкындырмадым. #Әкиятләрбуйлапгид`ны яратам, чөнки ул безгә шәһәр һәм анда яшәүчеләр белән диалогка керергә шәп мөмкинлек бирде. Курсның кураторлары һәм дәрес бирүчеләр – үз эшенең югары дәрәҗәдәге осталары, яңа гына гид булган кызлар исә – шәһәргә гашыйк энтузиастлар, мондый команданың бер өлеше булу – зур бәхет. «Заманча сәнгать картасында Әлмәтнең урыны» экскурсиясендә мин сәнгатьнең Әлмәт диварларында пәйда булу өчен нинди юл үткәнен һәм Әлмәтнең Рәсәй паблик-арт башкаласына әверелү өчен үткән юлын күрсәтергә тырышам. Бергәләп детальләрне җентекләп карарга һәм һәр әсәрнең «башлангыч код»ын күрергә өйрәнергә тырышачакбыз».

«#Әкиятләрбуйлапгид шәһәр, тарих, сәнгать һәм үзең турында күбрәк белү мөмкинлеге ача. Бу – җирледән дөньякүләмгә һәм киресенчә шәхси кабул итү аркылы сәяхәт, үткәннәрнең эзе белән бүгенге көндә очрашу. Шулай ук минем өчен әлеге проект – дөньяны матур якка үзгәртүче үз эшенең остасы булган иҗади кешеләр белән очрашу да.

Үземнең «Алтын алмалар эзләгәндә» дип аталучы экскурсиямдә мин иң кыйммәтле нәрсәнең синең яныңда гына икәнен күрсәтәм, бары тик туктарга, җентекләп карарга һәм күрергә генә кирәк».

«Мин процесс эчендә булудан, яңа белем алудан һәм сәгатькә якынаюдан ләззәт алам, ә әкиятләр буйлап гид булу ул – Әлмәтне матур якка үзгәртүче иҗади төркем эченә кереп китү мөмкинлеге. Бүгенге көндә шәһәр урамнары безнең белән әкиятләр, мифлар, мәдәният һәм тарих телендә сөйләшә. Һәм ул тавышны ишетү үзеңне яхшырак белү өчен мөһим һәм кызык, шуңа күрә минем экскурсиям «Шәһәр белән сөйләшү» дип атала».

«#Әкиятләрбуйлапгид миңа туган шәһәремнең тарихын яхшырак өйрәнергә һәм белемемне теләүчеләр белән уртаклашырга мөмкинлек бирде. Үткәнебез бик бай һәм кызыклы, аның турында хәтер сакланырга һәм киләчәк буыннарга күчәргә лаек. «Муралларның туган як белән бәйләнеше» дип аталучы экскурсиямдә мин муралларга яшерелгән тарих һәм аларның ничек барлыкка килүе турында сөйлим».

«#Әкиятләрбуйлапгид – ул бер яктан шәһәр тарихы, аның үткәне һәм бүгенгесе белән танышу, икенче яктан – яңа кешеләр, шул исәптән дөньяның төрле почмакларыннан килгән рәссамнар белән аралашу. Миңа шәһәрнең иҗади үзәгендә булу, рәссамнарның иҗат җимешләреннән илһам алу ошый. Велосипедта үтүче «Шәһәрдән илһам алу» һәм җәяүле «Каһарман юлы» экскурсияләрем шулай барлыкка килде».

«#Әкиятләрбуйлапгид – ул яңалыкка адым, минем чын күңелдән шәһәрдә яшәүчеләрне һәм кунакларны «Алтын алмалар турында әкиятләр» проекты белән таныштыру теләге. Аны барлыкка китерүчеләр тарихыбызда булган мәдәни байлыкларны һәрвакыт хәтерләргә, хөрмәт итәргә һәм карап торырга кирәк дигән фикергә яңа сулыш бирергә теләгәннәр. Нәтиҗәдә бөтен дөньядан килүче сәләтле, иҗади кешеләр бу фикерне үткәннәр турында хәтерне үзебез һәм киләчәк буыннар өчен саклаучы муралларга әйләндерде. Минем экскурсиям «Дивардагы хикәяләр» дип атала. Минем өчен бу – үзеңне күрсәтү, төрле милләт, раса, дин кешеләрен берләштерү, барыбызга да дус-тату яшәргә, мәдәниятне, традицияләрне, халык авыз иҗатын, ата-бабаларыбызның гореф-гадәтләрен хөрмәт итәргә һәм сакларга кирәклеген искә төшерү өчен әйбәт мөмкинлек».

«#Әкиятләрбуйлапгид төбәгебезнең тарихы һәм традицияләрен тирәнрәк өйрәнергә һәм белемем белән Әлмәттә яшәүчеләр һәм кунаклар белән уртаклашырга мөмкинлек бирде. «Мәхәббәттән – сәнгатькә» дип аталучы экскурсиямдә мин чын сәнгать сөю хакына яши һәм һәр мурал үзенә хас мәхәббәт белән сугарылган дигән фикер белән уртаклашам».

«#Әкиятләрбуйлапгид шәһәрнең тышкы кыяфәтен матур якка үзгәртүче зур һәм кызыклы проектның бер өлеше булырга, сәләтле кешеләр белән танышырга һәм иҗади атмосферага кереп китәргә, төбәк тарихы һәм урам сәнгате турында яңа белем алырга, шәһәрне һәм үземне яңа яктан ачарга мөмкинлек бирде. Велосипедта үтүче «Чорлар бәйләнеше» дип аталучы экскурсиямдә мин муралларның нигезендә ятучы һәм бүгенге көндә чагылыш табучы үткәннәрнең хикәяләрен сөйлим».

«#Әкиятләрбуйлапгид үземне яңа яктан ачарга: паблик-арт атмосферасына чумарга, рәссамнарның иҗаты белән танышырга, үземне экскурсовод ролендә сынап карарга һәм шәһәрдә яшәүчеләр белән кунакларга һәр муралның идеясен туган төбәкнең тарихы белән бәйләп аңлатырга мөмкинлек бирде. Минем экскурсиям «Татар халкының тарихы һәм әкиятләре арасында нечкә чик» дип атала. Аның дәвамында мин татар халкының заманча образы формалашкан юл турында риваятьләр һәм фактлар белән уртаклашам».