Радиолярияләр

Рәссам Сергей Соболев ясаган «Радиолярияләр» сәнгать объекты нефть чыгару тарихына һәм Татарстанның уникаль геологик ландшафтына сылтама ясый. Скульптура композициясе нигезендә – борынгы диңгез чорындагы микроорганизмнар – радиолярия скелетлары. Аларның органик өлеше сапропель – күп гасырлык сулык төбе катламнары – составына кергән, алардан шул исәптән нефть барлыкка килгән.

Радиолярия калдыклары безнең көннәргә кадәр таш һәм панцирь рәвешендә килеп җиткән, алар туфрак эрозиясе хисабына җир өслегенә чыккан. Геологик эзләнү вакытында нәкъ менә шушы калдыклар буенча җир астында нефть булуын фаразларга мөмкин. Радиолярияләр әлегә кадәр Җирдә, башлыча, җылы диңгезләрдә һәм океаннарда яши. Бу бер күзәнәклеләрнең диаметры 1 миллиметрдан артмый. Аның каруы, Соболевның масштаблы һәйкәлләрендә аларның челтәрле скелетларының бөтен үзенчәлекләрен күрергә мөмкин. Фәндә радиолярияләрнең 10 меңгә якын төре билгеле.

Радиоляриянең күптөрлелеге. Чыганак: Биологик энциклопедия.

Башта Сергей Соболевка нефть чыгару темасына сәнгать объекты булдыру бик үк җиңел булмады. Рәссам үз иҗатында гадәттә табигый формаларга тартыла. Күпләрнең аңында нефть – ул бик үк табигый нәрсә түгел кебек. Әмма бу шулай ук табигатьнең бер өлеше, һәм аның барлыкка килүенең геологик тарихы бар.

Автор өчен радиолярияләрне, бигрәк тә аларның форма төрлелеген өйрәнү гаҗәеп ачыш булды. Нәтиҗәдә, Соболевның сәнгать объекты борынгы микроорганизм скелетларының шактый төгәл, ләкин меңләгән тапкыр зурайтылган сурәте булып чыкты. Алар өчен материал итеп ташка охшаган ак фибробетон сайланды. Рәссам сүзләренчә, һәйкәлләр ясаганда иң авыры форма ясау булган. Ул бер тапкыр гына кулланылганлыктан, фибробетон салганда хаталар булмаска тиеш.

«Радиолярияләр»не ясау процессы.