Галәм

Кул эшләреннән бәйләм бәйләү Татарстанда киң таралган. Борынгы һөнәр булуына карамастан, аның заманча укылышы да бар. Рәссам Катика Әлмәткә, гадәти ысул ярдәмендә заманча темага осталык дәресе үткәрергә килде.

Соңгы сезонның темасы төрле чагылышта кайгырту булды. Үзең һәм якыннарың турында кайгырту, тышкы дөнья белән сыйфатлы диалог турында кайгырту, бездән соң нәрсә калачагы һәм бездән соң яшәячәк кешеләр турында кайгырту. Бу – паблик-арт программасының әлеге сезонына хас мотив кына түгел, ә проект тәмамлангач төркемнең шәһәрдә калдырырга теләгән мәгънә һәм кыйммәтләре дә. «Алтын алмалар турында әкиятләр» паблик-арт программасының 2022 елгы соңгы сезонының «Шәһәр белән диалог» юнәлеше кысаларында осталык дәресләре үтте. Алар Әлмәт ишегалларында оештырылып, анда яшәүче кешеләр рәссамнар белән берлектә сәнгать объектлары барлыкка китерде.

Катика – текстиль буенча рәссам, чыгышы белән Маҗарстаннан. Ул башлыча ыргык белән бәйләү юнәлешендә эшли, кеше бәйлелеге темасын (Attachment, 2016; Kiss, 2018), шәхси һәм күмәк хәтер (Glitch-kulich, 2019; Grannie's Pixel: in Memory of Yuri Gagarin, the First Man in Space, 2019; Remembering Princess Diane, 2019, мәдәни символлар һәм аларның массакүләм мәдәнияткә йогынтысын өйрәнә (Bjork, 2018; Gaga, 2018).

Рәссамның Әлмәттә ясаган урам бәйләве 2000 елларда АКШта киң таралыш алган. Урам бәйләве – шул ук граффити кебек, тик бәйләп ясалган. Бу трендны башлаган Магда Сайегның Knitta исемле үз төркеме һәм үз тэглары – I Love Knitta язулы биркалар – булган. Катика үзенең урам практикасында төрле бәйләмнәр ясады: Эдвард Мункның «Кычкыру»ына һәм Ван Гогның «Йолдызлы төн»енә оммаж, Мәскәүдә ясалган зур күзләр һәм йөрәк һәм Birth. Fragments of the Face сериясе.